Tölvupóstsfíknin

Ég var að hlusta á einhverja konu á Bylgjunni áðan sem var að tala um fíkn fólks. Hún tók dæmi um mann sem var svo háður tölvupóstinum sínum að hann þurfti að kíkja á hann í hvaða tölvu sem hann sá J

 

Örugglega er þetta ýkt dæmi en ef ekki þá hefði ég viljað sjá heimildarmynd um hann.

 

En hvað er málið í dag með þessa endalausu sjúkdómsgreiningu, ef það er hægt að hafa gaman af einhverju þá er maður háður því samkvæmt greiningunni.

 

Hvernig komst fólk af áður fyrr mér er spurn. Var kannski bóndinn sem var alltaf að spá í hvernig veðrið yrði næstu daga Veðurháður ?

Barnaheimspeki

Fátt er eins skemmtilegt og að hlusta á spekina sem vellur upp úr börnunum okkar. Ég og Júlía (4 ára) dóttir mín vorum að hlusta á lagið “Hjálpum þeim” í bílnum á leiðinni í sund. Eins og henni er líkt þá fór hún að spyrja mig um hvað lagið væri sem ég skýrði út fyrir henni. Það tók mikið á hjá henni að hugsa um það að litlu börnin í útlöndum fengu ekki mat og ættu mörg ekki foreldra. Eftir smá íhugun hjá prinsessunni þá sagði hún “ef þú og mamma fara til guðs þá fæ ég bara nýja mömmu og pabba” J 

Áður en við förum ofan í laugina þá fáum við okkur sitthvorn kleinuhringinn en níski pabbinn kaupir bara eina kókómjólk til sameiginlegra nota sem sú litla eignar sér strax. Dúllan skipar mér að fara að kaupa nýja þar sem ég fengi ekki sopa hjá henni og lætur mig vita af því að hún eigi fullt af peningum í sparibauknum sínum. Ég bendi henni á að það eigi ekki að eyða peningum að óþörfu og betra væri að senda peningana til fátæku barnanna í útlöndum svo þau fái mat. Þegar kleinuhringurinn er orðinn að mylsnu þá segir hún við mig “pabbi þú átt að senda börnunum mat svo þau fari ekki til guðs” sem bræddi mig alveg en þar sem hún hafði rétt áður frætt mig um ríkidæmi sitt þá ýjaði ég því að henni að hún gæti gert það sama. Það stóð ekki á svarinu “nei þetta eru mínir peningar” 

Snemma beygist krókurinn J 

Er þetta ekki einmitt raunin í dag, það finnst öllum skelfilegt hvað er að gerast í Súdan, Zimbabwe, Írak osfrv. En fæst af okkur gera eitthvað til að hjálpa til heldur vonumst við alltaf til að “pabbi” okkar sjái um það.

Fyrsta bloggfærsla

Þessi færsla er búin til af kerfinu þegar notandi er stofnaður. Henni má eyða eða breyta að vild.